DEPUTAT :”Ermənistan və havadarları anlamalıdır ki, şoularla nəticə əldə etmək mümkünsüzdür”
Ermənistan tərəfindən nəqliyyat vasitələrinin Laçın sərhəd buraxılış məntəqəsinin qarşısında cəmləşdirilməsi, medianın, Avropa İttifaqının təxribatçı missionerlərinin yaxınlıqda mövqe tutub azərbaycanlıların erməniləri necə “blokadada saxlaması”, “beynəlxalq hüququ necə pozmasını” qeydə almağa hazırlaşması siyasi spekulyasiya və növbəti təxribata cəhddir.
“Turanın səsi ” xəbər verir ki , bu barədə açıqlamasında Milli Məclisin deputatı Bəhruz Məhərrəmov bildirib.
Deputat deyib ki, əgər Ermənistanı və şounun digər iştirakçılarını humanitar vəziyyət maraqlandırırsa, Ağdam-Xankəndi yolunu həm daha effektiv və daha etibarlı, həm də qarşılıqlı etimad mühitinin yaradılması baxımdan səmərəli alternativ kimi təşviq etməlidir: “Reallıqda humanitar böhran çevik yanaşma tələb etməlidir və əgər Qarabağda humanitar böhran varsa, (əlbəttə ki, yoxdur) humanitar məqsədlərlə 330 kilometr uzaqlıqda yerləşən İrəvana üz tutmağı təşviq etməkdənsə, 70-75 km-lik məsafədəki müasir şəhərlər olan Bərdəyə, Tərtərə, 150 km məsafədəki Gəncəyə istiqamətlənmək daha effektiv olmazmı? Üstəlik işğaldan sonra yenidən qurulmaqda olan Bərdə-Ağdam yolu texniki və təbii göstəriciləri ilə qat-qat üstün və etibarlıdır və malların daha sürətli və səmərəli şəkildə çatdırılmasına imkan yaradır. Lakin bu yoldan imtina edilir. Proseslər də göstərir ki, humanitar böhran şousu səbəbsiz deyil, ermənilərin Ağdam-Xankəndi yolundan israrla imtina etmələrinin kökündə hansısa “qürurlu davranış” dayanmır, baş verənlər sadəcə, bir mərkəzdən idarə olunan anti-Azərbaycan fəaliyyətin bir hissəsidir. Xarici səfirliklərin, o cümlədən də Avropa İttifaqının təxribatçı missionerlərinin bölgəyə gəlişinin bir məqsədi var və bu da məlumdur. Hədəf Azərbaycanın iradəsinin qırılması, Laçın sərhəd-buraxılış məntəqəsinin ləğvidir ki, bu arzuları gözlərində qalacaq. Laçın sərhəd-buraxılış məntəqəsinə münasibətdə özünü söz sahibi kimi aparmaq cəhdi, bu məntəqənin ləğvini tələb etmək, giriş-çıxışı sərbəst formada terrorçuların, təxribatçıların ixtiyarına vermək Azərbaycanın suverenliyinə hörmətsizlikdir”.
Bəhruz Məhərrəmov qeyd edib ki, Azərbaycanın Konstitusiyasının 11-ci maddəsinə görə ərazimiz vahiddir, toxunulmazdır və bölünməzdir. BMT Nizamnaməsinin 2-ci maddəsinin 4-cü bəndi, Beynəlxalq hüququn prinsipləri haqqında 1970-ci il Bəyannaməsi və Avropada təhlükəsizlik və əməkdaşlıq üzrə 1975-ci il 1 avqust tarixli Helsinki Yekun Aktında müəyyən olunmuş prinsiplərə görə dövlətlərin ərazi bütövlüyü və dövlət sərhədlərinin toxunulmazlığı əsas şərtdir: “Ermənistan və onun havadarları anlamalıdır ki, qarşılarında 90-cı illərin Azərbaycanı deyil və belə şoularla nəticə əldə etmək mümkünsüzdür. İstənilən təxribatın cavabı artıqlaması ilə veriləcək. Qarabağın erməni əsilli sakinləri də anlamalıdır ki, onlar sadəcə çirkab alət kimi istifadə olunurlar, bu təxribatçı səylərin məqsədi hansısa erməninin haqları yox, hüquq və azadlıqlar pərdəsi altında Sorosun işğal edə bilmədiyi dövlətlərə peşəkar xaç yürüşlərinin təşkil olunmasıdır”.
⤵️
” TURANIN SƏSİ “_ ARZU PAŞAQIZI