Zambiya Milli Assambleyasının nümayəndə heyəti Milli Məclisdə olub
Mayın 19-da Milli Məclis sədrinin birinci müavini Əli Əhmədov BMT-nin Bakıda keçirilən Ümumdünya Şəhərsalma Forumunun On Üçüncü sessiyasında (WUF13) iştirak etmək məqsədilə ölkəmizdə səfərdə olan Zambiya Respublikası Milli Assambleyasının sədr müavini Malunqo Kisanqanonun rəhbərlik etdiyi nümayəndə heyəti ilə görüşüb.
Görüşdə urbanizasiya çağırışlarının müasir dövrdə beynəlxalq ictimaiyyətin diqqət mərkəzində olduğu qeyd olunaraq, Azərbaycanın qlobal şəhərsalma problemlərinin həllinə, eləcə də yüksək səviyyəli, açıq və inklüziv dialoq platformalarının təşviqinə verdiyi mühüm dəstəkdən bəhs olunub. Milli Məclis sədrinin birinci müavini Əli Əhmədov bildirib ki, WUF13 dünya miqyasında keçirilən ən mühüm tədbirlərdən biri hesab olunur və onminlərlə qonağın iştirakı ilə Bakıda təşkil edilən bu mötəbər forum Azərbaycanın beynəlxalq urbanizasiya problemlərinin həllinə verdiyi töhfənin bariz nümunəsidir.
Arzu Paşaqızı