Bu əməkdaşlıq Azərbaycana mühüm nəticələr qazandıracaq – DEPUTAT
Cənubi Qafqazın lider dövləti Azərbaycan, multilateralizm prinsipini əsas götürərək çoxtərəfli diplomatiya siyasəti həyata keçirir. Qoşulmama Hərəkatında uğurlu sədrlikdən sonra, Azərbaycan bu təşkilatda yenə də olduqca aktiv və səmərəli fəaliyyət göstərir. Ölkəmiz eyni zamanda COP29-un sədr ölkəsi olaraq dünya iqlim diplomatiyasını da aktiv şəkildə formalaşdırır, Qlobal Cənub və Qlobal Şimal ilə dialoq aparır. Bu konteksdə həm də BRİCS ölkələri ilə dialoq aparılır və əməkdaşlıq həyata keçirilir.
“turaninsesi.az” xəbər verir ki, mövzu ilə bağlı fikir bildirən Milli Məclisin deputatı Naqif Həmzəyev bildirib ki, Azərbaycan BRİCS-ə daxil olan ölkələrlə sıx əməkdaşlıq içərisindədir:
“Azərbaycan Respublikasının Prezidenti İlham Əliyev Rusiya Federasiyasının Tatarıstan respublikasının Kazan şəhərində keçirilən BRİCS sammitində təmsil olunur və dünən bu istiqamətdə çox maraqlı görüşlər keçirildi. Bundan öncəki BRİCS görüşlərində də biz cənab prezidentin iştirakına şahidlik etmişdik. Faktiki olaraq, BRİCS-də təmsil olunan dövlətləri nəzərdən keçirsək, görərik ki, bu ölkələrlə Azərbaycanın ikitərəfli və üçtərəfli münasibətləri mövcuddur. BRİCS çərçivəsində də bu münasibətlərin daha da inkişaf etdirilməsi, genişləndirilməsi üçün əla şərait var. Bu bir platformadır və Azərbaycan bu platformanı yaxşı mənada istifadə etməkdədir. Ölkəmiz bu platforma vasitəsi ilə bir çox məsələlərin həllinə də nail olub. Düşünürəm ki, hal-hazırda BRİCS-də iştirak etməklə, təşkilatda təmsil olunan dövlətlərlə münasibətlərimizin daha da inkişaf etdirilməsi üçün əlverişli şans yaranıb. Azərbaycan ilk növbədə öz milli təhlükəsizliyinin təmin edilməsi, bir çox risklərin qarşısının alınması, iqtisadiyyatımızın gücləndirilməsi və inkişaf etdirilməsi üçün BRİCS-ə daxil olan dövlətlərlə əməkdaşlığı önəmli hesab etməkdədir. Ən məsələlərdən biri isə, BRİCS-də təmsil olunan dövlətlər bir-birlərinin daxili işlərinə qarışmaq, dövlət suverenliyini təhdid altında qoymaq və hansısa öhdəliklərə məcbur etmə kimi yanaşmalar müşahidə edilməməkdədir. Bu da BRİCS-i cazibədar edir”.
Millət vəkili vurğulayıb ki, BRİCS-lə münasibətlərin inkşafı siyasi və iqtisadi baxımdan, Azərbaycana mühüm töfhələr verəcək:
“Yaxın gələcəkdə baş verə biləcək təlatümlər, təhdidlərlə birlikdə mübarizənin birlikdə həyata keçirilməsi, eyni zamanda beynəlxalq layihələrin icrasında əməkdaşlıq və Azərbaycanın yerləşdiyi coğrafi məkanın cazibədar olması BRİCS dövlətləri üçün də çox maraqlıdır. Bu baxımdan, Azərbaycan hazırki mövcud reallıqları, öz potensialı ilə müqayisədə daha əlverişli imkanlara dəyişmək istəyir. Azərbaycan həm logistik məkanda enerji resurslarının, xüsusilə “yaşıl enerji”yə keçidin təşkil edilməsində bu dövlətlərlə əməkdaşlığa maraqlıdır. Eyni zamanda regionumuzda uzunmüddətli və davamlı sülhün əldə edilməsi, qarşılıqlı əməkdaşlıq əsasında birgə inkişafı təmin edə bilmək üçün bu ölkələrin də iqtisadi dəstəyi çox yüksək qiymətləndirilir. Nəticə etibarı ilə, Azərbaycan bütün beynəlxalq platformalarda olduğu kimi, BRİCS-dən də dövlət maraqlarına xidmət edəcək bütün mümkün alətləri öz xeyrinə yönləndirə biləcək”.
⤵️
” TURANIN SƏSİ “_ ARZU PAŞAQIZI