ISW: Kreml bir sıra ölkələri “Vaqner”lə əməkdaşlıqdan vaz keçməyə məcbur etməyə çalışır

Rusiya Müdafiə Nazirliyi Moskvada keçirilən “Armiya-2023” forumundan bir sıra ölkələri “Vaqner” özəl hərbi şirkəti (ÖHŞ) ilə əməkdaşlıqdan imtina etməyə məcbur etmək və Rusiya Müdafiə Nazirliyinin nəzarətində olan özəl hərbi şirkətləri reklam etmək üçün istifadə edə bilər.

“Turanın səsi ” xəbər verir ki, bu barədə Müharibə Araşdırmaları İnstitutunun (ISW) gündəlik hesabatında əks olunub.

Beləliklə, Rusiya hökuməti bəzi Afrika ölkələrinin rəhbərliyinin “Vaqner”lə mövcud əlaqələrdən istifadə etməyə davam edəcəyi təqdirdə onlara hərbi-texniki və maddi dəstəyi dayandıracağı ilə hədələyir.

Mənbələrin məlumatına görə, Rusiya Müdafiə Nazirliyi artıq Burkina-Faso rəsmilərinə belə bir ultimatum göndərib. Bu iddialar əsasən “Vaqner” muzdluları ilə əlaqəli mənbələrdən gəlir, lakin bu iddialar Kremlin Priqojının dəstəsini Rusiya Müdafiə Nazirliyinin nəzarətində olan ÖHŞ-lərin xeyrinə məhv etmək və ya yenidən strukturlaşdırmaq istədiyi barədə əvvəlki ISW qiymətləndirmələrinə uyğundur.

Eyni zamanda, institutun gündəlik hesabatında Rusiya-Ukrayna müharibəsinin gedişatına dair informasiya məkanında yayılan vacib bilgiləri də təqdim edib.

Belə ki, Ukrayna qüvvələrinin yaydığı məlumatlar və videolar Ukrayna Silahlı Qüvvələrinin Urojayneni azad etdiyini təsdiqləyir.

Avqustun 15-dən 16-na keçən gecə Rusiya qüvvələri Ukraynaya, ilk növbədə, Odessa vilayətindəki liman infrastrukturuna bir sıra dronlarla zərbələr endirib.

Rusiyalı senatorlar Rusiya ordusuna aid məlumatların yer aldığı foto və videoların yayılmasını qadağan edən düzəliş təklif ediblər.

Rusiya mənbələri iddia edib ki, Moskva ordu generalı Sergey Surovikini avqustun əvvəlindən ev dustaqlığına salıb.

Rusiya qoşunları Kupyansk-Svatove xəttində, Baxmut bölgəsində və Avdiivka-Donetsk xəttində hücum əməliyyatları keçirib.