Borcunu ödəməyənləri nə gözləyir? –MƏCLİSDƏN yeni qərar

Milli Məclisin bugünkü plenar iclasında borc tələbinin borclunun qiymətli kağızlarına yönəldilməsini nəzərdə tutan qanun layihəsi müzakirə olunaraq sonuncu üçüncü oxunuşda qəbul edilib.

“turaninsesi.az ” xəbər verir ki, bununla əlaqədar “İcra haqqında” və “Qiymətli kağızlar bazarı haqqında” qanunlara müvafiq dəyişikliklər edilib.

Sənədə əsasən, “İcra haqqında” qanuna “Tələbin borclunun qiymətli kağızlarına yönəldilməsi” adlı yeni 46-1-ci maddə əlavə olunub. Yeni normativ maddə tələbin həm borclunun fiziki olaraq özündə aşkar edilən sənədli qiymətli kağızlarına, həm onun adına qeydə alınmış sənədsiz qiymətli kağızlara, habelə mərkəzi depozitarda saxlanılan sənədli qiymətli kağızlara yönəldilməsinin dəqiq hüquqi mexanizmini müəyyənləşdirir.

Qanunvericiliyə edilən dəyişikliklərə əsasən, borclunun qiymətli kağızlarına dair məlumatların sorğu olunması, onların üzərinə həbs qoyulması və tələbin həmin qiymətli kağızlara yönəldilməsi ilə bağlı bütün prosedurlar “Elektron icra” informasiya sistemi vasitəsilə həyata keçiriləcək. Layihədə, həmçinin “Qiymətli kağızlar bazarı haqqında” qanunda da müvafiq uyğunlaşdırmalar aparılıb.

Qanun layihəsi parlamentdəki müzakirələrdən sonra səsverməyə çıxarılaraq üçüncü oxunuşda təsdiqlənib.

Arzu Paşaqızı