Milli Məclis 2026-cı ilin dövlət büdcəsi layihəsini ikinci oxunuşda qəbul edib – YENİLƏNİB

Milli Məclis “Azərbaycan Respublikasının 2026-cı il dövlət büdcəsi haqqında” qanun layihəsini ikinci oxunuşda qəbul edib.

“turaninsesi.az” xəbər verir ki, parlamentin bugünkü plenar iclasında müzakirə edilən layihə ikinci oxunuşda qəbul olunub.

Qeyd edək ki, gələn il büdcə gəlirlərinin 38 milyard 609 milyon manat (2025-ci ilin təsdiq olunmuş proqnozuna nisbətən 0,7 % çox), xərclərinin isə 41 milyard 703,6 milyon manat (+0,7 %) olacağı gözlənilir.

Son nəticədə dövlət büdcəsində 3 milyard 94,6 milyon manat kəsir yaranmalıdır. Bu isə illik müqayisədə 1,4 % çoxdur.

2026-cı ildə Azərbaycanın icmal büdcəsinin gəlirlərinin isə 44 milyard 969,4 milyon manat, xərclərinin isə 48 milyard 839,3 milyon manat olacağı gözlənilir.

Bunlar, 2025-ci ilin təsdiq olunmuş proqnozlarına nisbətən müvafiq olaraq 2,3 % və 2,5 % çoxdur.

Son nəticədə icmal büdcədə 3 milyard 869,3 milyon manat kəsir yaranmalıdır. Bu isə illik müqayisədə 5,2 % çoxdur.

Büdcədə neftin bir barelinin qiyməti 65 ABŞ dolları götürülüb.

11:03

Milli Məclisin payız sessiyası üzrə növbəti plenar iclası başlayıb.

“turaninsesi.az” xəbər verir ki, iclasın gündəliyinə 2026-cı il dövlət büdcəsi zərfinə daxil olan qanun layihələrinin ikinci oxunuşda müzakirəsi daxil edilib.

İclas spiker Sahibə Qafarovanın sədrliyi ilə keçirilir.

Arzu Paşaqızı