Kreml “Rus Evi”nin bağlanmasına münasibət bildirdi: “Yalnız iki prezidentin dialoqu…”
Kreml ümid edir ki, Bakıdakı “Rus Evi”nin taleyi iki prezident arasında dialoqda həll oluna bilər.
“turaninsesi.az” xəbər verir ki, Vladimir Putinin mətbuat katibi Dmitri Peskov bildirib.
“Kreml Bakıdakı “Rus Evi”nin bağlanması qərarından təəssüflənir və bu məsələnin Rusiya və Azərbaycan prezidentləri səviyyəsində təmaslar olacağı təqdirdə müzakirə oluna biləcəyini istisna etmir.
Biz buna təəssüflənirik. Hesab edirik ki, bu, ikitərəfli təmaslarla həll oluna bilən anlaşılmazlıqdır”.
Peskov “Rus Evi”nin bağlanmasını şərh edərkən əlavə edib:
“Bu məsələni müxtəlif səviyyələrdə həmkarlarımızla qaldıracağıq. Əgər yüksək səviyyədə təmaslar olarsa, o zaman istisna etmirik ki, bu məsələ iki dövlət başçısı arasında dialoqda da qaldırıla bilər”.
Fevralın 6-da “Rossotrudniçestvo”nun rəhbəri Yevgeni Primakov bildirib ki, Rusiya Azərbaycan Xarici İşlər Nazirliyindən “Rus Evi”nin Bakıda qeydiyyata alınması və ya onun fəaliyyətinin dayandırılması zərurəti ilə bağlı nota alıb.
Azərbaycan Xarici İşlər Nazirliyinin mətbuat xidmətinin rəhbəri Ayxan Hacızadə daha sonra məlumat verib ki, belə təşkilatların Azərbaycan ərazisində fəaliyyəti milli qanunvericiliyə, ölkələr arasında qarşılıqlılıq prinsipinə və ikitərəfli əsasda əldə edilmiş razılaşmaların tələblərinə uyğun olaraq tənzimlənir.
Hacızadə qeyd edib ki, “Rossotrudniçestvo”nun Azərbaycandakı nümayəndəliyi olan Rusiya İnformasiya və Mədəniyyət Mərkəzi – “Rus Evi”nin hüquqi şəxs kimi qeydiyyata alınmaması və qurumun Azərbaycan qanunvericiliyini ciddi şəkildə pozması barədə Rusiya tərəfinə məlumat verildikdən sonra 2025-ci il fevralın 3-də “Rus Evi”nin fəaliyyətinin dayandırılması ilə bağlı Rusiya tərəfinə nota göndərilib.
“Beləliklə, Azərbaycan tərəfinin Rusiya Evinin ölkəmizdə fəaliyyətinə xitam verilməsi ilə bağlı qərarına uyğun olaraq, Rusiya tərəfinin bu istiqamətdə müvafiq tədbirlər görəcəyi gözlənilir”, – Azərbaycan Xarici İşlər Nazirliyinin nümayəndəsi vurğulayıb.
Rusiya Xarici İşlər Nazirliyinin nümayəndəsi Mariya Zaxarova işin dayandırılması ilə bağlı notanın alındığını təsdiqləyib. Onun sözlərinə görə, cavab olaraq Rusiya tərəfi informasiya və mədəniyyət mərkəzlərinin yaradılması və fəaliyyətinin şərtləri haqqında ikitərəfli hökumətlərarası saziş əsasında Azərbaycan Respublikasının qanunvericiliyinə uyğun olaraq “Rus Evi”nin qeydiyyatının başa çatdırılması üçün zəruri tədbirlər görməyə hazır olduğunu bildirib”.
O, Rusiyanın müvafiq məsləhətləşmələr çərçivəsində diplomatik kanallar vasitəsilə dəfələrlə bu məsələni Azərbaycan tərəfinə təklif etdiyini xatırladıb və məsələnin müsbət həll olunacağına ümid etdiyini bildirib.
⤵️
” TURANIN SƏSİ “_ ARZU PAŞAQIZI