“Ermənistanla sərhəddə nəzarət-buraxılış məntəqəsinin yaradılması vacib idi” – RƏY

“Azərbaycanın Dövlət Sərhəd Xidməti tərəfindən Ermənistan–Azərbaycan sərhədində nəzarət-buraxılış məntəqəsinin yaradılması vacib idi ”.

“Turanın səsi ” xəbər verir ki , bunu mətbuata açıqlamasında Milli Məclisin deputatı Azər Badamov deyib.

Deputat qeyd edib ki, Azərbaycan müharibə meydanında düşmən ordusunu darmadağın edərək ərazi bütövlüyünü təmin edib. Amma müəyyən məsələlər qalmışdı və onlar da danışıq masası arxasında həll olunmalı idi.

Millət vəkili hesab edir ki, müharibənin bitdiyi 2,5 ildə Ermənistanla danışıqlar masasında hər hansı bir nəticənin əldə olunmadığı üçün Azərbaycan öz ərazisinin bütövlüyünü və təhlükəsizliyini təmin etməlidir:

“Bu, Azərbaycanın suveren hüququdur. Laçın-Xankəndi yolunun Ermənistana birləşən yerində DSX-nin nəzarət-buraxılış məntəqəsinin yaradılması da məqsədlərimizdən biridir və lazımlı, vacib məsələ idi. Çünki, Azərbaycan özünün suveren ərazilərini qorumalıdır. Bu beynəlxalq normaların tələbidir. Həm də yolun başlanğıcında “Siz Azərbaycanın ərazisinə daxil olursunuz. Ölkənin qanunlarına riayət etməyiniz xahiş olunur!” yazısı da qoyulmalıdır. Laçın-Xankəndi yoluna daxil olan hər kəs özünü Azərbaycanın suveren ərazisinə daxil olduğunu hiss etməlidir. Belə olmasa ermənilərin özbaşınalıqları davam edəcəkdir”.

Onun sözlərinə görə, nəzarət məntəqəsi hələ ki qanuni daşımalara və hərəkətlərə icazə verəcəkdir. Sülhməramlıların funksiyası müəyyən olunmuş ərazidə təhlükəsizliyi təmin etməkdir:

“Sülhməramlılar öz fəaliyyətlərini qanun çərçivəsində müəyyən olunmuş müddətə qədər davam etdirəcək. Ondan sonra Azərbaycan öz suveren sərhədlərini beynəlxalq normalara uyğun tənzimləyəcək”.

Deputat əlavə edib ki, Laçın –Xankəndi yolunda aksiyalar başlayana qədər Ermənistan separatçılara minalar, silah-sursat və canlı qüvvə daşıyırdı:

“Bu da 2021-ci ildə buraxılmış minaların yenidən basdırılaraq terror hadisələrinin davam etməsinə, hərbçilər və vətəndaşlarımızın xəsarət almasına yol açırdı. Həm də 10 noyabr Üçtərəfli Bəyanata əsasən Rusiya sülhməramlılarının müvəqqəti yerləşməsi ilə paralel olaraq Ermənistan öz hərbçilərini Azərbaycanın ərazilərindən çıxarmalı olduğu halda, onlar isə əksinə kontingentin sayını çoxaldaraq 10 mindən çox nəfərə çatdırdılar. Bu da Azərbaycanın ərazisi daxilində yeni hərbi gücün formalaşmasına şərait yaratmış və hər zaman təhlükə mənbəyinə çevirmişdi. Həm də yolda nəzarət olmayanda Ermənistan Qarabağdan yeraltı sərvətləri talayıb aparırdılar. Bu müddətdə sülhməramlılara, Ermənistana, Birgə Monitorinq Mərkəzinə dəfələrlə xəbərdarlıqlar olunmuşdu. Amma bütün narahatçılıqlarımız cavabsız qalırdı. Təbii ki, Ermənistanın bu özbaşınalıqlarına son qoyulmalı idi”.

Azər Badamov vurğulayıb ki, nəzarət postunun yaradılması mülkü məqsədlər üçün yoldan istifadəni məhdudlaşdırmır:

“Amma bundan sonra hərbi təyinatlı yüklərin daşınması və qeyri-qanuni fəaliyyətlərin davam etdirilməsi mümkün olmayacaq. Qarabağda yaşayan ermənilər reallığı artıq qəbul etməlidirlər. Belə bir deyim var: “Gəmidə oturub kapitanla dava etmək olmaz”. Qarabağdakı ermənilər də Azərbaycanın ərazilərində oturub dava aparmaq istəyir. Təbii ki, bu yolverilməzdir. Qarabağda yaşayan ermənilər Azərbaycan bayrağı altına keçmək və qanunlarımızdan yararlanaraq öz gələcəklərini qurmalıdırlar. Bu proses nə qədər tez baş tutarsa, onlar separatçıların əsarətindən də bir o qədər tez xilas olunaraq müstəqil ölkənin xoşbəxt vətəndaşları olaraq yaşaya biləcəklər”.

⤵️
” TURANIN SƏSİ “_ ARZU PAŞAQIZI