Deputatlar televiziyaları sərt tənqid edib: “Milli əxlaqı, dəyərləri sıradan çıxarırlar”
“Bu gün televiziya kanallarında əyləndirmə mexanizmləri var, amma klassikanın ictimailləşməsi, klassikanın bizim milli dəyərimizə çevrilməsi baxımından müəyyən boşluqlar var”.
“Turanın səsi ” xəbər verir ki, bu fikirləri Milli Məclisin Mədəniyyət komitəsinin üzvü Nizami Cəfərov komitənin aprelin 14-də keçirilən iclasında İctimai Televiziya və Radio Yayımları Şirkəti Yayım Şurasının üzvlüyünə namizədlikləri irəli sürülmüş şəxslərin seçilməsi məsələsinin müzakirəsi zamanı deyib.
“Hesab edirəm ki, Yayım Şurasının üzvlüyünə namizədlikləri irəli sürülmüş şəxslər sırasında yer alan AMEA-nın Əlyazmalar İnstitutunun baş direktoru Teymur Kərimli bu sahəyə öz töhfəsini vermiş olacaq”, – o vurğulayıb.
Vətəndaş Həmrəyliyi Partiyasının sədri, deputat Sabir Rüstəmxanlı isə söyləyib ki, bu gün bəzən televiziya kanalları cəmiyyətin dağılması, parçalanması, milli əxlaqın, dəyərlərin sıradan çıxmasında mənfi rol oyanır.
O bildirib ki, televiziyalar müəyyən qədər ölkənin rəsmi və ideoloji sisteminin keşiyində dayanmağa çalışsalar da, efirdə şou proqramlar üstünlük təşkil edir və bu da narahatlıq doğurur: “Bu baxımından İTV özünü nisbətən qoruya bilir”.
S.Rüstəmxanlı eyni zamanda bir çox təşkilatlarda ictimai şuraların yaratmaq dəbindən də danışıb: “Amma təəssüf ki, bunun çoxu söz olaraq qalır. Yəni ictimai şuranın rəyi ya nəzərə alınmır, ya da rəyləri əsassız olduğundan fikir verilmir. İctimai şuraların nə üçün yaradılması məsələsi parlament səviyyəsində müzakirə olunmalıdır. İTV-nin Yayım Şurasına seçiləcək namizədlər rəylərinin diqqətə alınması məsələsinə önəm verməlidirlər. Müəyyən verilişlərlə bağlı fikirləri olduğu təqdirdə televiziya rəhbərlərinə qəbul etdirməyə çalışmalıdırlar”.
Milli Məclisin Mədəniyyət komitəsinin sədri Qənirə Paşayeva S.Rüstəmxanlıya cavab olaraq bildirib ki, yayım şurası ictimai şuradan fərqlənən qurumdur: “Çünki yayım şurasının səlahiyyət və statusları da üstündür. Çünki yayım şurasının üzvlərini Milli Məclis təsdiq edir”.
⤵️
” TURANIN SƏSİ “_ ARZU PAŞAQIZI