Deputatlar ATƏT PA-nın İpək Yoluna Dəstək Qrupunun 

konfransında iştirak edəcəklər

Milli Məclisin ATƏT Parlament Assambleyasında nümayəndə heyətinin rəhbəri, qurumun vitse-prezidenti Azay Quliyev və deputat Tural Gəncəliyev təşkilatın İpək Yoluna Dəstək Qrupunun 4-cü beynəlxalq konfransında iştirak etmək üçün oktyabrın 17-də Türkiyənin İstanbul şəhərinə səfər edəcəklər.

Tədbirdə “Böhran dövründə təminat zəncirlərinin davamlılığı və qida təhlükəsizliyi”, “Davamlı ətraf mühit və inkişaf üçün enerji təhlükəsizliyi” mövzularında müzakirələr aparılacaq. ATƏT PA-nın İpək Yoluna Dəstək Qrupunun sədri Azay Quliyevin moderatorluq edəcəyi yekun iclasda İstanbul Bəyannaməsi qəbul ediləcək.

Konfrans çərçivəsində “İpək Yolu marşrutunda iqtisadi imkanlar” mövzusunda biznes-forum keçiriləcək.

Deputatlarımız konfransda müzakirəyə çıxarılacaq məsələlərə münasibət bildirəcəklər.

Səfər oktyabrın 19-da başa çatacaq.

Milli Məclisin Mətbuat və 

ictimaiyyətlə əlaqələr şöbəsi