Polkovnik-leytenant arvadının kotteclərini satıb ziyanı ödəmək istəyir

Müdafiə Nazirliyinin (MN) tabeliyindəki Azərbaycan Ordusunun Təlim və Tədris Mərkəzinin Maliyyə Xidmətinin sabiq rəisi, polkovnik-leytenant Rəşad Məlikzadənin cinayət işi üzrə məhkəmə prosesi keçirilib.

“Turanın səsi ” xəbər verir ki, müdafiə tərəfi vəsatət verərək bildirib ki, istintaq dövründə dəymiş ziyandan 160 min manat ödənilib. Nardaranda Ləhic bağları adlanan yerdə onun həyat yoldaşına məxsus kottec tipli beş bağ evinə istintaq dövründə həbs qoyulub və onların dəyəri real qiymətindən aşağı, yəni 684 min manat göstərilib.

“Rəşad Məlikzadə həbs olunmamışdan əvvəl Dövlət Təhlükəsizliyi Xidməti dəymiş ziyanın ödənilməsi üçün xəbərdarlıq edib. Ziyanı ödəmək üçün kotteclər satışa çıxarılıb və 40 min manat da beh alınıb. Həmin obyektləri 800 min manata satacaqdılar. O vaxt kottecləri alan şəxs Rusiyada olub. Ona görə satış edə bilməyiblər. Məhkəmədən xahiş edirik ki, həmin obyektlər üzərindən həbs götürülsün ki, sataraq dəymiş ziyanı ödəsinlər”, – müdafiə tərəfi bildirib.

Təqsirləndirilən şəxsin vəkili məhkəmədən xahiş edib ki, qeyd olunan faktlara görə R.Məlikzadə barəsində yüngülləşdirici qərarlar qəbul olunsun.

Həmçinin o vurğulayıb ki, Rəşad Məlikzadənin MN-in Maliyyə və Büdcə idarəsinə 480 min manat pul verilməsi ilə bağlı videomaterial istintaqa təqdim olunub. Müdafiəçi həmin videonun araşdırılmasını xahiş edib.

Məhkəmənin növbəti iclası mayın 29-na təyin olunub.

Qeyd edək ki, R.Məlikzadəni 26 sentyabr 2022-ci ildə DTX saxlayıb və Bakı Hərbi məhkəməsi qərarı ilə barəsində həbs qətimkan tədbiri seçilib.

9.369.411 manat pul vəsaitini mənimsəməkdə təqsirləndirilən sabiq rəis Cinayət Məcəlləsinin 179.4-cü (xüsusilə külli miqdarda mənimsəmə) və 313-cü (vəzifə saxtakarlığı) maddələri ilə ittiham olunur.

⤵️
” TURANIN SƏSİ “_ ARZU PAŞAQIZI