Fransa agentləri Azərbaycanda ifşa edildilər, həbs olunanlar var
Fransanın agentura şəbəkəsinin Azərbaycanda ifşa olunması ilə bağlı artıq bir sıra məlumatlar yayılıb. Azərbaycanda ifşa olunan şəbəkə Ukrayna, Moldova, Gürcüstan, Azərbaycan, Şərqi Avropa, Yaxın Şərq və Mərkəzi Asiyanın bir sıra ölkələrində müxtəlif məqsədli əməliyyatlar icra edib.
Fransanın agentura şəbəkəsi necə fəaliyyət göstərib?
“Turanın səsi ” in məlumatına görə, agentura şəbəkəsi Fransa səfirliyi daxilində fəaliyyət göstərib. Onlar bir sıra ölkələrin nümayəndələri ilə bağlı kəşfiyyat aparıblar. Şəbəkə regionda yeni məqsədlər formalaşdırmaqla təsir dairəsini genişləndirməyə çalışıb.
Şəbəkəyə daxil olan üzvlərin bir çoxu əvvəllər və ya indi Azərbaycanda xidmət edib, bəziləri isə müxtəlif ölkələrdə və nüfuzlu beynəlxalq təşkilatlarda çalışırlar.
Fransanın agentura şəbəkəsi Azərbaycanda necə ifşa olundu?
Azərbaycan təhlükəsizlik orqanları fəaliyyət istiqamətlərinin genişliyi, peşəkarlığı ilə hər zaman seçilib. Fransanın agentura şəbəkəsinin ifşa olunmasında da biz bu peşəkarlığın şahidi olduq. Fransa xüsusi xidmət orqanlarının geniş agentura şəbəkəsinin Azərbaycanda ifşa olunması da ölkəmizin xüsusi xidmət orqanlarının əzmkar fəaliyyətinin nəticəsidir.
Azərbaycan xüsusi xidmət orqanlarının apardıqları fəaliyyət nəticəsində uzun illər Fransa casus şəbəkəsinin ştatdankənar əməkdaşı olmuş vətəndaşlarından biri könüllü olaraq ölkəmizin hüquq-mühafizə orqanları ilə əməkdaşlıq edib. Mənbə bir çox vacib məlumatları da bölüşüb. O, Fransa agentlərinin fəaliyyətlərinə dair dəlil və sənədlər təqdim edib.
Həbs olunanlar var
Aparılan cinayət işi üzrə Azərbaycan xüsusi xidmət orqanları tərəfindən Ukrayna, Gürcüstan və Azərbaycanla əlaqədar kəşfiyyat fəaliyyətini həyata keçirən bir sıra şəxslər həbs olunublar, bəziləri barəsində isə araşdırma aparılır.
Yaxın zamanlarda bu barədə geniş məlumat veriləcəyi gözlənilir.
Sözügedən agentura şəbəkəsinin Azərbaycanda ifşa olunması isə Makron hakimiyyətinin növbəti fiaskosu kimi qiymətləndirilir. Artıq Fransa Prezidenti Emmanuel Makron Fransa Xarici Təhlükəsizlik Baş İdarəsinin rəisi Bernar Emyeni vəzifəsindən azad edib. Bernar Emyenin vəzifəsindən azad olunmasının əsas səbəbləri sırasında Qafqazda Fransa agenturasının ifşa olunması da göstərilir.
Əldə olunmuş faktlar növbəti dəfə sübut edir ki, Fransa hakimiyyəti beynəlxalq qanunvericiliyin tələblərinə məhəl qoymayaraq ayrı-ayrı dövlətlərin daxili işlərinə qarışır. Müxtəlif əməliyyatlar keçirərək öz məqsədlərinə çatmağa çalışır. Artıq Afrikadan Qafqaza kimi bütün fəaliyyət istiqamətləri üzrə Makron rejimi iflasa uğrayıb. Emmanuel Makronun yürütdüyü yanlış siyasət Fransanın bütün dünyada mövqelərini dağıdıcı zərbələr vurmaqda davam edir.
⤵️
” TURANIN SƏSİ “_ ARZU PAŞAQIZI