Azərbaycanın investisiya reytinqləri kateqoriyasına keçmək potensialı var

Azərbaycan iqtisadiyyatın şaxələndirilməsi, eləcə də xarici və daxili balanslarının yaxşılaşması ölkənin reytinqlərini qısamüddətli perspektivdə investisiya səviyyəsinə yüksəldilməsini şərtləndirir.

“Turanın səsi ” xəbər verir ki, bunu Rusiya “Qazprombank”ının Tədqiqatlar şöbəsinin müdir müavini, MDB ölkələri üzrə baş iqtisadçı Gülnarə Xaydarşina Bakıda keçirilən rəsmi görüşlərin yekunlarına dair danışarkən deyib.

Onun sözlərinə görə, Azərbaycan iqtisadiyyatının şaxələndirilməsi ölkənin Avrasiyanın nəqliyyat-logistika qovşağı kimi rolunu gücləndirməyə kömək edəcək: “Eyni zamanda, nəqliyyat sektorunun və əlaqəli infrastrukturun inkişafı ilə bağlı ÜDM-də nəqliyyat və tikintinin payı artacaq. Hesablamalarımıza görə, bu sahələrin Azərbaycanın ÜDM-dəki payı 2024-cü ildə 27 %-ə qədər arta və 5 illik perspektivdə 30 %-i keçə bilər. Bu qiymətləndirməyə Qarabağda həyata keçirilən yeni layihələrin təsiri də daxildir”.

G.Xaydarşina hesab edir ki, Azərbaycanın ÜDM-də qeyri-neft-qaz komponentinin artımı bundan sonra da Qarabağda yeni nəqliyyat və sosial infrastrukturun, sənaye parklarının və bərpa olunan enerji obyektlərinin tikintisini əhatə edən yeni layihələrlə dəstəklənəcək.

“Regiona turistlərin cəlb edilməsi planları iqtisadiyyatın qeyri-neft-qaz sektorunun genişlənməsinə də töhfə verəcək. Bundan əlavə, karantin məhdudiyyətlərinin aradan qaldırılması, eləcə də turist axını və qonşu ölkələrdən müəssisələrin köçürülməsi sayəsində biz ölkənin qeyri-neft-qaz sektorunda iqtisadi fəallığın bərpasını müşahidə edirik. Bu baxımdan, daxili tələbatın genişlənməsinin iqtisadiyyatın şaxələndirilməsinə töhfə verəcəyini gözləyirik. Təxminlərimizə görə, Azərbaycanın ÜDM-də daxili ticarətin payı 2023-cü ildə 18 %-ə, 2024-cü ildə isə 19 %-ə yüksələcək”, – bankın baş iqtisadçısı bildirib.

Qeyd edək ki, Azərbaycan aşağıdakı suveren reytinqlərə malikdir: “S&P” beynəlxalq reytinq agentliyinin – “sabit” proqnozu ilə “BB+” səviyyəsində; “Fitch”in – “müsbət” proqnozu ilə “BB+”və “Moody’s”in – “sabit” proqnozu ilə “BA1” səviyyəsində.