Rus sülhməramlıları Qarabağı tərk edəcək

Azərbaycanın ABŞ, Fransa və bəzi Qərb ölkələri ilə münasibətləri gərginləşə bilər. 

Qeyd edək ki, Azərbaycan Ordusunun Qarabağda antiterror əməliyyatları, nəticə etibarı ilə həmin ərazi üzərində bütöv suverenliyini və yurisdiksiyasını bərpa etməsi Qərbdə, xüsusilə ABŞ və Fransada müəyyən dairələri narahat edib. Onlar Azərbaycanın son addımını bölgədə yaşayan ermənilərə qarşı “etnik təmizləmə” kimi qiymətləndirirlər.

Artıq Fransa Milli Assambleyasında Fransa-Azərbaycan Dostlq Qrupu fəaliyyətini dayandırıb. Eyni zamanda, ABŞ Konqresində 90-na yaxın senator Dövlət Departamentinə Azərbaycana qarşı sanksiyaların tətbiq olunması üçün müraciət edib. Həmçinin Kanada da Azərbaycana qarşı sanksiyalar paketini nəzərdən keçirmək niyyətindədir. 

Bəzi ekspertlər hesab edirlər ki, ABŞ və Fransa qərəzli addımlar atacağı təqdirdə, bu, hər iki ölkənin Azərbaycanla münasibətlərində ciddi problemlər yaradacaq. 

“Turanın səsi ” xəbər verir ki , Məsələ ilə bağlı politoloq Tofiq Zülfüqarov açıqlamasında qeyd edib ki, hər iki ölkənin qanunvericilik orqanlarında erməni lobbisinin təsiri güclüdür: 

“İlkin olaraq qeyd edim ki, ABŞ, Fransa və bəzi Qərb ölkələrinin qanunvericilik orqanlarının bir sıra nümayəndələri birbaşa erməni seçicilərindən asılıdırlar. Bu baxımdan həmin millət vəkilləri öz siyasi maraqlarını təmin etmək üçün erməni lobbi təşkilatları ilə təmaslar qururlar, habelə onlara lobbi tərəfindən xüsusi imtiyazlar, hədiyyələr və vəsaitlər verilir. Qərbdə siyasi sistem məhz bu cürdür. ABŞ konqresmenləri və Fransanın millət vəkilləri onsuz da öz istədiklərini həyata keçirirlər”. 

T.Zülfüqarov hesab edir ki, onların ölkəmizə qarşı addımları heç bir nəticə verməyəcək: 

“Çünki 90-ci illərdən bu yana ABŞ Konqresində Azərbaycana qarşı 907-ci düzəliş aktı və digər sanksiya tipli aktlar qüvvədə saxlanılır. Otuz il ərzində Azərbaycanın torpaqları Ermənistanın işğalı altında qala-qala bu aktı qüvvədə saxlayırdılar. Ona görə də ölkəmiz öz ərazisində hansı addımları atsa belə, ABŞ Konqresində bir çoxları öz qərəzli münasibətindən əl çəkməyəcək. Onların məqsədi regionda xeyrini güdmək və istəklərinə nail olmaqdır”. 

T.Zülfüqarov bəzi ekspertlərin Rusiyanın Qarabağ siyasəti ilə bağlı səsləndirdiyi fikirlərlə razılaşmayıb: 

“Azərbaycan ictimaiyyətində belə baxışlar formalaşıb ki, guya Rusiya Azərbaycanın Qarabağda son addımlarını dəstəkləyib, guya bölgədə siyasi vəziyyət Moskva ilə bərabər tənzimlənib. Əslində  belə deyil. Reallığa baxanda görərik ki, Qarabağda vəziyyətin dəyişməsi Moskvanın ürəyincə deyildi. Çünki son hadisələr nəticəsində rus sülhməramlıları bölgəni tərk edəcəklər. Bu, həmçinin Ermənistanın Gümrü şəhərində rus hərbi bazasının ləğv olunmasına da şərait yarada bilər.

Əslinə baxanda Qarabağda yeni siyasi proseslər Qərbin xeyrinə olacaq. Ona görə ki, Cənubi Qafqaz üzərində nəzarət Qərbə Mərkəzi Asiyada öz siyasi və iqtisadi təsirinin artmasına imkan yaradacaq. Ancaq Azərbaycan və Türkiyənin ciddi dəstəyi olmasa, nə ABŞ, nə də Avropa ölkələri Mərkəzi Asiyada fəaliyyət göstərə biləcəklər”. 

ABŞ və Fransanın Azərbaycanla diplomatik münasibətlərində gərginləşmə hallarının yaşanacağına gəlincə, sabiq nazir bunun qeyri-mümkün olduğunu bildirib: 

“ABŞ və Fransada Azərbaycana qarşı səs-küylü bəyanatlar səsləndirilə bilər. Amma reallıqda bütün bunlar siyasi şounun bir hissəsi olacaq. Hesab edirəm ki, Azərbaycan və Türkiyə Qərbin geostrategiyasında önəmli ölkələr hesab olunurlar. Qərbin Mərkəzi Asiyada öz təsir imkanlarını artırmaq və bu regionda Çinə qarşı mübarizə aparmaq üçün Azərbaycana və Türkiyəyə ehtiyacı var”.